بعد توجيهات القعيطي محافظ البنك والتي دقت المسمار الاخير بنعش.البنك المركزي وطالما والجماعه مصرين على ان المجاعه تلتهم تعم كل المحافظات اللي مسيطرين عليها ومكدسين الزلط بالبدرومات وعندهم أمل ان الموظفين والجنود والمدرسين والاطباء وكل شخص يستلم راتب اما يشل بندقه ويسير يقاتل من شان هم يحكمو او يلتحق بمارب وعدن والرياض من شان يقولو ان ما وطنيين الا هم او يترك عمله ويرح له محافظته او قريته من شان يجيبو غيره استكمال للسيطرة السلاليه والمناطقيه على المناطق الواقعه تحت سيطرتهم اذا ما شل هذا الشعب بنادقهم وخرجوا الشوارع ينتزعو مرتباتهم من عيونهم ويخرجو زلطهم واموال بلدهم المكدسه بالبدرومات والا فهو شعب ماعنده كرامه ويستاهل الهيانه ومابيعملو به هكذا الا وهم عارفين وواثقين انه شعب ميت ...

 

تقول لي اطالب هادي بالمرتبات اوك اخرجوا من المؤسسات وعطفوا ولا عليكم الا يجيب هادي المرتبات لكن تقولو لنا طالبو هادي وانتو جالسين تؤمرو وتنهو وتحكمو وتحبسو وتقولو على هادي خاين وعميل وتشتوه يدفع لكم رواتب الموظفين والجنود والمدرسين والاطباء اللي بتحكموهم هذه من سخافات العقول..

 

بتقولوا اللي يشتي راتب يتجه الجبهه طيب ممكن تبتلع وتمتغط انكم تقولو هذا الكلام للجنود والجيش لكن لمدرسات مدرسة بلقيس او الصحيات والممرضات بمستشفى الامومه والطفوله او مدرسين المدارس او موظفين المؤسسات وعمال النظافه ودكاترة الجامعات فهذه اسمها استخفاف بالناس واستهبال..

 

تشتونا نسير الحدود نقاتل السعوديه صح 

 

على شان نكون نسقط المواقع ونقاتل وندفع دم والخمسه الاشخاص اللي مرافقين لمصور قناة المسيره ينبعو يدو الصرخه ولو قتلنا من راس حيد عالي لا زد بقي واحد حتى ما تكتبو اسمائنا بكشوفات الشهداء..

 

وبعدين كيف نسير نقاتل بالحدود ومحمد عبد السلام بظهران الجنوب بيبيع ويشتري ماتركبش..

 

كذا بالمفتوح قولو لنا ما تشتوا .. اتحاكوا اتنحنو قولو لا تستحوش ايش اللي تشتوه بالذات انكم بتشوفو المخنق بيشتد حول رقبة الناس منتظرين لتسويه وايقاف للحرب مش باين انها عتتوقف منتظرين يضربونا بقنابل نوويه من شان ما يعيش باليمن غيركم منتظرين نموت جوع ترتاحو منتظرين لمعجزه من السماء طيب ليش بتجمعو الفلوس والاموال وتكدسوها بالبدرومات والناس بتموت جوع بتشعرو بأرتياح وانتو تشوفو الناس مهتانه ومش لاقيه ما تأكل ايش اللي تشتوه فهمونا ايش تشتو بالضبط ..

 

صدقوني الغلط ماهو منكم 

الغلط عند هذا الشعب الميت الذي تهان كرامته وادميته وانسانيته وساكت. ...

#مرتباتنا_بالبدرومات

يالله سمعوني الكلمتين اياهم 

ياعميل يامرتزق ياخاين . اقتلوه .اسجنوه . 

يالله شغلو الاسطوانه المشروخه الممله والشعارات الزائقه عن الوطنيه والوطن والتضحيه والنضال والشرف والكرامه ..