يالطيف ياساتر لا لا أنا مو مصدقة معقوله؟ ايش في يا حرمة ربشتييني وفجعتييني؟ انت من متى بتاكل قات؟ نعم يختي انا ما بدخن ولا بشيش ولا حتى بعسل تقوليلي آكل قات، قال آكل قات قال ليه قالولك مجنون، طب اشبها خدودك وفكك مورمين كده حتى عيونك مو باينه من كتر الورم؟ يا مثبت العقل والدين دحين عشان خدودي وفكي مورمين خلاص صرت آكل قات هدا اللي في وجهي اسمه (ابوكعب) سلامة نظرك صحيت من نومي لقيت وجهي ورمان تقومي تقوليلي قات بدل ما تقوليلي سلامتك، وبعدين القات ما منه الا الخساير والامراض، طيب يا سيدي وايش حيستفيد اللي بياكل القات؟ ولا حيستفيد ولا شي بس خسارة فلوس وصحة وزي ما بيقولوا اهل العقول في راحة ولمن تجي تسأل اللي بياكل القات ليه كده بتسوي يا أخينا يقولك أسد الفراغ أي فراغ يبو فراغ دمرت حياتك وصحتك وأسرتك، حرام عليك انت بتصرف يوميا لا يقل عن 200 ريال عشان تشتري هادي الآفة اللعينة سألتك بالله الـ200 ريال مو أولى تصرفها على نفسك وأهل بيتك بدل ما ترميها كده في شجرة ما وراها إلا دمار صحتك وحياتك، تعال نحسبها انا وانت الـ200 ريال لو ضربناها في 200 ألف شخص بياكلوا قات كم حيطلع المبلغ تعرف كم أبغاك انت تحسبها وتشوف كم المبلغ مو حرام ندفع ده المبلغ يوميا عشان شجرة لعينة يا ناس يا هووه خافوا الله في أنفسكم وفي أهلكم وأولادكم حرام ده اللي جالسين تسوووه ربنا حيحاسبكم على ده التفريط في مالكم وصحتكم، بصراحة تحزن على العالم دي اللي بتاكل القات تلاقيهم مجتمعين ومتكييين آخر تكية وهات ياقطف وقرقعة وياريتهم يكتفوا بكده لا تلاقي السيجارة والعه والا الشيشه (الحمي) شغاله وما في إلا مضغ وشفط ونفخ تشوفي خدودهم تقولي مسوين فيها سيليكون من كتر النفخ اللي فيها وبعد ساعه من المضغ تلاقي كل واحد منهم صار رئيس جمهورية وما في إلا كلام وكلام يجر كلام ولا إذاعة لندن ويضيع وقتهم وتضيع صلواتهم على شي تافه، والمصيبه الكبيره إنه الرجال العواجيز اللي ما عندهم سنون وبياكلوا قات وعشان ما عندهم سنون بيحطوا القات جوة مطحنة الفلفل وهات يا تخزين أقولك شجرة ملعونه يبغالها حرق والا أيش الفايده منها ما منها فايده بس خسارة فلوس وصحة وأضرار جسمية وعقلية واكتئاب وأرق وقلة نوم لكن ما نقول إلا الله يهدي ما خلق، طب والحل ياسيدي كيف نحمي الناس والأجيال من هادي الشجرة الملعونه؟ أول شي وهدا المهم لازم من تشديد الرقابة على الحدود اللي بيننا وبين البلد اللي بتزرع هادي الشجرة وما نخلي ولا جنس مخلوق يدخل هادي الشجرة على بلدنا وبعد كده يكون فيه توعية ومحاضرات وندوات تقوم بتوعية الناس بمضار هادي الشجرة اللي ما وراها إلا خراب البيوت وطفرنة الجيوب، وياريت كمان أئمة المساجد يتكلموا عن هادي الشجرة في خطبهم وينصحوا الناس عشان قد ما يقدروا إنهم يتركوها ويتركوا أكلها ولازم يكون في أحكام مشدده على اللي يهربها وعلى اللي يتعاطاها عشان نحمي بلادنا وشبابنا من هادي الشجرة اللعينة وعيشوا كتييير تشوفوا كتييير